„Që nga Alpet e deri në Jon“

Ndërtimi i rrugës Durrës-Kukës-Prishtinë

Shqipëria qenka një vend shumë i madh. Të duhen dy ditë të tëra për ta kaluar nga veriu deri në jug. Kështu mund të thuhet se Shqipëria është më e madhe se Franca. Pa dyshim është më e madhe se Gjermania.

Vetëm që nuk mund të lexosh gjatë udhëtimit sepse në kthesat e panumërta të zë makina. Të mbetet vetëm ta kundrosh pejsazhin mahnitës, që do të tërhiqte shumë më tepër turistë, veçanërisht nga Kosova, po të ishin më të mira rrugët.

Eshtë e vërtetë që në vitet e fundit u ndërtuan, rindërtuan, riparuan dhe asfaltuan shumë rrugë. Në Shqipërinë jugore mbetet vetëm si investim kryesor për t’u bërë akoma autostrada Lushnjë-Vlorë. Janë shembullore pjesa rrugore mes Durrësit dhe Tiranës duke përfshirë lidhjen e kryeqytetit me aeroportin e tij si, dhe ajo mes Sarandës dhe Butrintit, që u shtrua në fillimin e mileniumit të ri.

Në veriun shqiptar, situata është më e rëndë. Në fakt gjendja e mjerueshme e rrjetit rrugor është një nga pengesat kryesore për qarkullimin e lirë, që përfshin veçanërisht edhe lëvizjen e turistëve. Nëntë orë përafërsisht të duhen për të përfunduar udhëtimin nga Prishtina në Durrës, një distancë 330 kilometërshe. Më e keqe është një pjesë malore kur për 70 kilometra të duhen tri orë rresht. Dhe njeriu mund të kënaqet nëse makina nuk bie poshtë në ndonjë luginë të bukur, sepse sigurimi i anëve të rrugës është i dobët poashtu.

Për gjendjen e punimeve në boshtet kryesore rrugore të Shqipërisë, inxhinieri Niko Naska nga Ministria e Rregullimit të Territorit dhe Turizmit shkruan: „Në aksin lindje-perëndim me gjatësi 247,1 km, i njohur si korridor 8, i cili fillon në portin e Durrësit dhe përfundon në pikën kufitare të Qafë-Thanës (157,1 km i gjatë), së bashku me dy segmentët e tjerë rrugorë, Qafë Thanë-Pogradec dhe Pogradec-Kapshticë (93 km të gjatë), punimet e ndërtimit kanë përfunduar në masën rreth 55 % të tyre. Në aksin veri-jug me gjatësi 373,7 km, i cili fillon në pikën kufitare të Hanit të Hotit dhe përfundon në pikën kufitare të Kakavijës, punimet e ndërtimit kanë përfunduar në masën 35 % të tyre“.

Do vijë asfalti dhe bashkë me asfaltin, shpresa. Këtë shpresë na jep kryeministri Pandeli Majko. Më 18 qershor u diskutuan në një konferencë nën ombrellën e tij variantet e mundshme për ndërtimin e një rruge në Kosovë që do të kalojë nëpër zonën e shpërfillur të Kukësit. Sipas inxhinierit Naska, varianti që shkon nga Durrësi nëpër Fushë Krujë, Rubik, Rrëshen, Reps, Fan, Thimë, Kukës dhe Morinë në Prishtinë ofron kushtet më të përshtatshme. Parashikohet një sistem tunelesh dhe urash për t’ia dalë zot relievit. Kjo rrugë nuk do ta stimulojë vetëm turizmit klasik të zonat bregdetare, por dhe atë në zonat e hijshme malore të cilat do t’i përshkojë rruga. Para së gjithash do t’i shpëtojë rrethet e Kukësit dhe Peshkopisë nga katastrofa si në dimrin e kaluar, kur me rreshje të shumta bore u shkëputën nga bota dhe banorët u furnizuan me ushqime nga ushtria dhe KFOR-i.

Të gjitha punimet do të kushtojnë mbi 50 miljardë lekë. Rreth 10 për qind duhet të mbulohen nga një taksë e veçantë, e cila, për të mos krijuar padrejtësi sociale dhe për të mos dëmtuar ndërmarrjet e vogla dhe të mesme, do të merret nga importet, karburantet dhe taksapaguesit e mëdhenj. Janë më se të nevojshme investime dhe donacione të mëtejshme. Qeveria shqiptare për këtë arsye është duke negociuar me Bankën Botërore.

Prandaj herët a vonë, por jo tepër vonë, do të vijë koha kur kosovarët që dëshirojnë të pushojnë në Sarandë nuk do të humbin më katër ditë vetëm në rrugë.

© 2002 Silke Liria Blumbach

http://www.shqiponja.de

shqiponja@shqiponja.de