Koincidencë historike

Gjermania dhe Shqipëria në Këshillin e Evropës

         13 korrik 1950. Gjermania përpiqet të kapërcejë fajin e nacionalsocializmit dhe traumat e luftës. Një vit përpara u krijua në perëndim monedha e shtetit të ri të demokratizuar nën mësimin e aleatëve, ndërsa pjesa lindore mbyllet gjithmonë më shumë. Të dy gjysmat e Gjermanisë zhvillohen me shpejtësi në dy drejtime të kundërta duke u larguar prej njëra-tjetrës.

         Një vit përpara, më 5 maj 1949, dhjetë shtete evropiane kishin nënshkruar marrëveshjen e Londrës, e cila e themeloi Këshillin e Evropës, organizatën e parë evropiane, tetë vjet para Bashkimit Ekonomik Evropian, Unionit Evropian të mëvonshëm. Belgjika, Danimarka, Franca, Irlanda, Italia, Luksemburgu, Vendet e Ulëta, Norvegjia, Suedia dhe Britania e Madhe kishin krijuar me këtë akt një organizatë që disa e quajnë ndërgjegje demokratike të Evropës. Me 13 korrik 1950, edhe Gjermania hyn në këtë organizatë, bashkë me Islandinë.

         13 korrik 1995. Kurse motrat dhe vëllezërit veriorë pësojnë zgjedhën serbe, shqiptarët nga Shqipëria përpiqen, pas një gjysmë shekulli, të marrin frymën e lirisë. Asgjë e lehtë kur kurrë s'pate mundësi të mësosh si të marrësh frymë, asgjë e lehtë në një vend të shkatërruar ekonomikisht. Për shumë njerëz, rruga e hapur drejt lirisë dhe lumturisë mbaron në papunësi ose në thellësinë e detit adriatik.

         Këshilli i Evropës, edhe pse pak në hijen e Unionit Evropian, ndërkohë ka shtuar peshën, përvojën, numrin e nënorganizatave, kartave dhe konvencioneve si dhe numrin e anëtarëve. Mbas rënies së komunizmit dhe hapjes së Evropës lindore, demokracitë e reja në lindje gjejnë në Këshillin një kornizë të përshtatshme për t'u integruar në të ashtuquajturën "familje evropiane" dhe për t'u stabilizuar me nhihmën e anëtarëve të tjera të kësaj familjeje. Së pari, që në vitin 1990, u anëtarizua Hungaria, ai vend që u gjet edhe në fillim të procesit të ribashkimit gjerman duke hapur kufijtë e saj me Austrinë, për në perëndim, gjë që kishte shkaktuar një valë të madhe refugjatësh nga Gjermania lindore.

         Ndërsa Gjermania, me të hyrë në Këshillin e Evropës, u përcoll prej një vendi nordik, Shqipëria e bën këtë hap bashkë me një shtet tjetër "të transformacionit": Moldavia.

Mos i ngatërroni

Këshilli i Evropës shpeshherë ngatërrohet me Këshillin Evropian. Këshilli Evropian është një organ i Unionit Evropian. Është mbledhja e ministrave të shteteve anëtare që përfaqësojnë dikasterin përgjegjës për problemin që diskutohet në këtë mbledhje. Vendimet e Unionit Evropian bëhen në këtë Këshillin Evropian. Ndërsa Këshilli i Evropës është një organizatë me vetë, krejt e pavarur nga Unioni Evropian, me tani 41 anëtarë.

         As nuk duhet të ngatërrohen Parlamenti Evropian dhe Mbledhja Parlamentare. Parlamenti Evropian është Parlamenti i Unionit Evropian. Deputetët e tij zgjedhen në zgjedhje të përgjithshme drejtpërdrejt nga popullsia a shtetëve përkatëse. Mbledhja Parlamentare është parlamenti i Këshillit të Evropës, anëtarët e të cilit caktohen në mes të deputetëve të parlamentëve kombëtare. Do të thotë, atje përfaqësohen parlamentet dhe jo banorët vetë, si në Parlamentin Evropian.

         Po çfarë është ky Këshilli i Evropës?

         Qëllimet e Këshillit të Evropës janë: mbrojtja e të drejtave të njeriut, fuqizimi i demokracisë pluraliste, përkrahja e identitetit të përbashkët kulturor të evropianëve si dhe kërkimi i zgjidhjeve të problemeve të mëdha sociale. Këto probleme janë, për shembull: diskriminimi i pakicave, racizmi, mbrojtja e mjedisit, drogat, kriminaliteti i organizuar etj. Si detyrë e re historike, Këshilli i Evropës i ndihmon vendet në tranzicion duke mbështetur reformat politike dhe kushtetuese. Në kundërshtim me Unionin Evropian, aspekte ekonomike nuk janë në rradhë të parë. Nga spektri i veprimtarisë përjashtohet fusha e mbrojtjes ushtarake.

         Prej të tri organeve të Këshillit të Evropës, Mbledhja Parlamentare, që u përmend më lart dhe në të cilën Shqipëria ka katër deputetë, ka vetëm funksionin këshilltar. Vendimet bëhen në Komitetin e Ministrave, i cili përbëhet nga ministrat e jashtëm të shteteve anëtare ose nga përfaqësuesit të tyre diplomatike. Komunat dhe rajonet përfaqësohen në Kongresin e Komunave dhe Rajoneve të Evropës. Këshilli i Evropës ka edhe një Sekretariat të Përgjithshëm, ku Sekretari i Përgjithshëm zgjedhet çdo pesë vjet.

         Selia e Këshillit të Evropës është në Strasburg, Francë, në Pallatin e Evropës (Palais de l'Europe), para të cilit valavitet edhe flamuri shqiptar kuq e zi.

         Një prej vendeve që e presin anëtarizimin në Këshillin e Evropës është Bosnja-Hercegovina ... një shembull që ndoshta edhe Kosova do të ndjekë në një kohë jo tepër të gjatë.

         Po sot është dita kur, edhe pse në vite të ndryshme, pas kapërcimit të diktatureve më të tmerrshme të këtij kontinenti, edhe Gjermania edhe Shqipëria u bënë anëtarë të Këshillit të Evropës. Koincidencë historike e këtyre dy popujve-vëllezër, këtyre shteteve-miq ...

Silke Blumbach