"Women for Women" zgjeron aktivitetet në Kosovë

         (Uashington, korrik 1997)

         Kur je në mjerim, kur ke humbur shtëpinë dhe njerëzit e dashur, kur në luftë ke humbur çdo gjë që deri më dje e përbënte jetën tënde, kuptohet se ke nevojë për ndihmë. Ke nevojë për shtrehim, ushqim dhe mjekim, por gjellat që pregatiten në tenxheret e mëdha të shërbimeve humanitare ndoshta nuk ta ngopin urinë shpirtërore. Më së shumti nevojitet një dorë miqësore, fjalë ngushëlluese, një sup për të qarë hallet ose një letër që vjen prej së largu si mesazh shprese.

         "Women for Women" e lidh prandaj ndihmën materiale me ndihmën në nivelin personal, njerëzor. Kjo organizatë solidariteti midis grave me seli në Uashington proteston dhe vepron kundër krimeve dhe pasojave të luftës. "Ne ndihmojmë vetëm sipas nevojës, pavarësisht nga kombësia ose nga përkatësia fetare." Kjo ndihmë bëhet nëpërmjet sponzorizimit. Njerëz të interesuar bëhen sponzorë të grave që janë bërë viktima të luftës. Duke u shkruar letra dhe duke u dhënë kontribute financiare modeste, por të rregullta, sponzorët ua kthejnë atyre grave besimin në jetë dhe në vetveten, për të rindërtuar jetën e tyre. Edhe sponzorët përfitojnë nga kjo formë ndihme duke mësuar çfarë pasojash të tmerrshme paska lufta dhe duke pasur njëkohësisht një mundësi për t'i përballuar sado pak.

         Përveç kësaj, "Women for Women" organizon edhe programe formimi profesional, kështu që gratë bëhen ekonomikisht të pavarura nga ndihma humanitare. Gjithashtu vihen në dijeni për të drejtat e tyre sociale, ekonomike dhe politike.

         Para luftës së Kosovës, "Women for Women" zhvilloi veprimtarinë e saj në Ruandë dhe në Bosnjë. Me më shumë se gjysmë miljoni dollarë, i ka ndihmuar më shumë se 1600 gra refugjate. Për angazhimin në Bosnjë, "Women for Women" u nderua prej Presidentit Klinton në dhjetor 1995.

         Në prill të këtij viti, organizata filloi të sponzorizonte 250 familje kosovare në kampet e refugjatëve, familje që nuk morën asnjë ose gati asnjë ndihmë tjetër. Brenda dy muajve u mblodhën më shumë se 17.000 dollarë për to.

         Tani "Women for Women" do të sponzorizojë edhe gra të sapokthyera ne Kosovë. Prej tyre, me urgjentisht u nevojitet ndihma grave fshatare larg qyteteve të mëdha. Në kuadër të projektit synohet gjithashtu të themelohet një qendër grash në Kosovë, për të krijuar lidhje solidariteti ndërmjet grave në tërë Kosovën që e kanë mbijetuar dhunën politike, kështu që ato mund ta mbështesin njëra-tjetrën.

Silke Blumbach